CNLD Tanhtu Sin Cakuat

(30.9.2020) CNLD tanhtu unau hna, Party tanhnak ah aho paoh tanh khawh cio a si. Tanh duhnak belte a ruang a khat cio lai lo. 2020 thimnak caah CNLD, Slogan ah ‘Covo’ lak ding ti a si. Hi “Covo” hi Chin Covo lawng si loin Kawlram chung miphun dang vialte Covo an ngei cio ve. Cu “Covo” cu khuaika ah a um? Mah tein khuakhan- lairelnak timi biafang hi Bochoh Aungsan a nun lioah hmanmi biafang a si. Hi biafang hi ralkap nawlngeihnak 2008 phunghrampi chungah a tel lo. 1990 tiang kha cu Party poh nih duhmi thil hal khawh, chim khawh a si.

2008 phunghrampi a um hnu cun duhmi poh a ngah ti lo. CNLD Slogan ah “COVO” lak ding timi CNLD thantar hi ralkap uknak phunghrampi ah a um lomi biafang a si. Tlangcungmi duhmi pek le pek lo nawlngeihtu ralkap Dictionary ah ‘Covo’ timi Biafang a tel lomi hngalh buin miphun tanh ding timi ruahnak menmen in CNLD tanh caan a si nan timi hi zeiruangah a si? Nan fim, nan thiam, nan hngalh taktak ahcun tha tein khuaruat u. “Chin” timi miphun min hi sullam ngei loin zuar hlah u.

CNLD candidate pawl nih Chin state mp thutdan 24 ah 6 hi ralkap ta a si i atangmi 18 vialte CNLD nih teinak a hmuh dih ahcun Chin cozah kan tlaih lai an ti. Hmun 18 vialte tei khawh lo ding a fiang komi nan zumh rih. CNLD candidate cheukhat nih CNLD nih hmun 7 teinak kan hmuh ahcun ralkap ta 6 he fonh in cozah kan ser khawh lai an ti. Ralkap ruangah kan ram hi sifakmi le retheimi kan sining hngalh buin ralkap cu nan bochan rih.

CNLD candidate pawl nih Center ah NLD nih cozah a tlaih lai i Chin State ah CNLD nih cozah a tlaih ding a si caah kannih CNLD hi kan pek ko u an ti. Ralkap uknak a dohmi NLD nih ralkap bochanmi CNLD sawm in Chin cozah sernak lam a um lomi cu nan zumh rih. Facang ci na cin lawngah facang kung a kho lai. Facang ci cin in fangvoi kung a kho bal lai lo. Center (Baho) ah NLD nih cozah tlaih i Chin State ah CNLD nih cozah tlaih ding cu sullam pakhat hmanh a um lo.

NLD nih Cozah a ser khawh ti lai lo timi bia hi Mahameih (alliance) party (30) pawl thluak a si. NLD nih cozah a peh ding a fiang ko caah ralkap nawlngeihnak a donghter taktak cang lai a ti i ralbawizik Min Aung Hlaing zong a hngilh kho ti lo, Bomb le Covid-19 tehna hmangin buainak lam a kawl lengmangmi a si. 2008 phunghrampi chungin tlangcungmi covo lak khawh a si lo, aho covo hmanh hmuhnak lam a um lo.

CNLD nih thutdan 18 vialte hmuh khawhnak lam a um lo, NLD nih Center cozah tlaih in CNLD nih State cozah tlaih khawhnak sullam a um lo. Thimnak ni a dih in nan ton dingmi hna cu – 1. CNLD nih si khawhnak lam kaubik a ngeihmi cu State hluttaw hmun ah teinak a hmumi MP vialte Chin State Hluttaw Meeting kai khawh a si lai. Chin cozah riantuannak a zohfel khawh lai. Lahkhah ting 5 cio an hmuh lai. CNLD MP hmurka in Covo biafang a chuak ti lai lo. Cozah biafang a chuak ti lai lo.

Me thlak lioah tanhtu pawl nih nan tanhmi MP pawl he chawnh khawh nan si ti lai lo. Miphun tanh timi hi a caan a um, atu cu 2008 phunghrampi ruangah zeihmanh tuah khawh a si lo bantukin hmuh khawhnak lam zong a um rih lo, hi ralkap uknak lungpi hi lamkam ah kan thial hlan chung cu NLD tanh rih ding a si kan timi mitcaw sa tlaih bantukin Miphun tanh biafang nan tlaih caah a caan a phak tikah – “Ka ruahsual”, “ka tanhsual”, “ka palhsual”, “ka ngaichih tuk”, “ka ning a zak tuk”, timi dirhmun na phan te lai. Philh hlah.

Hi bantuk dirhmun na phak tikah MP le CNLD party hruaitu pawl mawchiat hrimhrim hlah. Politics ahcun hmuhnak le teinak ding caah Hlen phung a si, Lih phung a si ve. Teinak a hmuhmi MP pawl cu Lahkhah tal an ei lai. A sungtu cu Me petu nangmah kha na si lai. Kan ram dirhmun le sining kan chim lomi si loin mah tluk kan chim cangmi na zumh duhlonak theipar si ko seh. Aho ruangah a si lo, Nangmah ruangah a si lai. Philh hlah. Philh cio hlah u. Catialtu Laiki Chozah.