Cikhatte ah mirum si ko dingmi duhloin a charmi phaisa tingtampi angeitu sinah pe thantu Saihka monghtu pa

Tutan ahcun tingtampi phaisa achar nain lakduhnak lungthin kaltak dihin angeitu sinah arak pe than dihtu Saihka monghtu pa konglam kanrak langhter tuah lai. Amah cu Bago ramthen Pyi khuapi Nawin kanna lampi pawngah khua asami U San Win (saihka monghtu pa) asi. Amah nihcun saihka number 1661 monghin nichiar eidin dingmi akawltu asi.

An sifah tuk ruangah angki zong athami hruk kholoin a tetdihmi angki he nilin ruahsur tangah nichiar saihka hmangin eikawltu asi. Nai February 30 lioah kha thla hlawh lakni asibangin Myanmar Econamic Bank ah cozah riantuan phaisa tlaitu nu pakhat nihcun phaisa rak lakchuah ve. Mah cozah riantuantu pa pakhat nihcun a phaisa lakmi hnacu Bank pawngkam um PCO pawngkam ahcun chiah takin phone arak chonh.

Mahlioah cun amah rak dongtu motor arak phanh cang tikah cun arannak in motor chungah cun arak lut ti asi. An office an phanh tikah cun thlahlawh ava lakmi phaisa ting 90 cu Bank hmai PCO pawngkam ah arak kaltak ticu avan theih. Cu tikah cun mah phaisa tlaitu nu cu alucungah meitil chiah bangin alu cu arak lindih colh tikah cun a riantuanpi hawi hna zong lungnuamlo ngaiin achiah hna.

Bank pawngkam ah saihka dirtein mi arak nghaktu U San Win nihcun PCO pawngkam ah plastic in thilfun pakhat ahmuh tikah cun arak zoh. Mah tikah cun a chungah phaisa lawngte a um timi zong cu arak hmuh colh. Mahticu mah phaisa lakah pandaung timi catial ahmuh tikah cun asaihka hmangin pandaung motor gate leiah cun ava kalpi.

Sinain motor gate ahcun mah phaisa ngeitu bantu minung hohmanh ava hmuhlo tikah cun a dirnak Bank hmai ahcun arak kirthan. U San Win umtuzia an rak hmuh tikah cun minung pathum hna nihcun a kut chung phaisa cu anmah ta asii rak kan pe tiah anrak hal. A pek hnalo ahcun fahnak pe duh dingmi an sitikah U San Win nihcun thil sining cu zohin “Nan phaisa asi takah cun palik sinah bank chungin la than ko u” tiah a chim.

Mah hnu in cun Myanmar Economic Bank hmaiah um Securitiy hmangin Bank manager sinah a pek than. Mah minung pathum hna zongcu an tli colh ve ti asi. Arauh hlante ahcun phaisa thlautu phaisa tlaitu nu zongcu arak phan ve. Bank manager sinin Bank hmaiah arak philhmi phaisa dihlak hnacu tlamtlingtein arak hmuh dih than tikah khuaruah harin aum.

Mah nu nihcun saihka monghtupa cungah a lawmhtuk ruangah tu thla ahlawh dingmi tingkhat cu apek dih ve i mipi hmaika bakah upat peknak arak tuah hnawh. Saihka monghtu pa nih cun kala lailo tiah arak tanglen ve nain mah nu nihcun tahbuin la dingah arak nawl len ve tikah cun arak lakpiak ve. Mah thilcangmi arak zohtu mipi hna le bank manager hna cu mithli tlain an tuah hna.