Chin Miphun Caah Mizo Holh Cu Tlangholh A Si Te Ko Lai

Chin miphun nih common language (tlangholh) kan tuah/ser khawh zokzok lo ahcun kum zeimaw zat a rauh hnu ah Mizo holh cu Chin miphun i tlangholh ah a chuahte ko lai/a cang te ko lai. Ram a tthat lo ruang zongah pakhat cu a si ve.

Atu ahhin Chin state hmunkip ah mizo holh cu kan thiam dih ngawt cang hna. Atu le ram tthat lo ruangah Mizoram ah Chin miphun 40,000 leng an um hoi. Hi hnu ah pa zeizat dah an i thial rih lai kan thei lo.

Mah hna pawl nih mizo holh cu kumkhat ah an thiam zau fawn lai. Chin state i a ummi nungak tlangval, nutung patung tamdeuh cu Mizoram ah duhherh zalh ah an kal dih cang fawn hna. Aruang cu motor le motorcycle in duhtawk in an kal kho cang hna fawi tein.

Kalay le Mandalay kal hmanh kha an caah ttih a nung deuh cang fawn. Mah tik ah mizo holh cu an thiam deuhdeuh cang hna lai/an thiam zau fawn hna lai. Mizo holh a tthinci (zohsang deuh) a karh lai.

Mizoram i a ummi Chin miphun 40,000 leng nih Mizo holh cu duhtawk in an thiam cang lai i Chinram i an rak kir tik zongah Mizo holh in lehmi movie le video dang pawl le hla pawl lawng kha an ngaih cang hna lai i mizo holh cauk zong an rel len cang hna lai.

Mizo holh thawngpang chimmi (Zonet le LPS te paw) lawng an ngaih duh cang lai. Aruang cu an tling deuh fawn. Kan unau Mizo pawl cu an holh in movie le video tthattha hrim an lehmi a tam tuk cang.

Cauk le bang cu miphun dang holh in ttialmi an lehmi a tamtuk cang. Mah pawl ko nih cun Tahan le Kalay i a ummi Chin miphun pawl cu a suai ciammam hna i riandang ttuan zong tlolh dih lak in mizo holh lehmi movie cu an zoh cang hna.

Cucaah Chin miphun upa te nih Mizo holh cu Chin miphun i tlangholh caah kan duh lo ahcun atu bak in biatak tein ttan kan lak a hau ve lai a lamkip in. Kan duh zong duh lo zongah mizo holh cu Chin miphun caah tlangholh a si te ko lai caan zeimaw zat a rauh hnu ah. Crd: Saya Van Tum