Chin Mi Nih Kan Raltuk Hi Gideon Raltuk Kan Hluan!

Kan ram uknak a thatlo ruangah,Chin miphun nih kan umnak hmun cio in mah le sikhawhtawk in kan cawlcaang hna.Hi ah hin a cheu nih hriamnam i ken in ral an tu hna i,a cheu nih tangka thazaang le ruahnak he rak tuk cio a si.

Nikum 2021, i uknak tha lo nih rampi uknak an laak khan chikhat lungthawh ah mi tampi cu miphun dawtnak le ram dawtnak ngeih hlenglo in,Unifrom i hruk in tlawnlen kha uar in ralkap ah a luut mi tampi an um hna ti mi hi lih a si lo i,a dikmi te a si ko caah ngamh ngai in kei zong nih ka ttial ngamnak hi a si.

Israel mi hna cu harnak phunkip an tong ṭhan. An tonnak a ruang cu Jehovah Pathian bia an rak ngaih duh lo caah a si. Midian mi hna nih an tei hna i an hrem hna. Cucaah Israel mi hna cu Jehovah Pathian sin ah an au i bawmhnak an hal. Jehovah Pathian nih an aunak cu a theihpiak hna.

Jehovah Pathian nih ralkap pum hna tiah a ti caah Gideon nih ralkap 32,000 a pumh hna. Israel mi a dohtu ralkap cu 135,000 ansi. Asinain Jehovah Pathian nih Gideon cu: ‘Mi tam tuk na ngei,’ a ti rih. Zeicahdah Jehovah nih mah ti cun a ti? Zeica’h kan ti ahcun, Israel mi nih ral kha an tei ahcun, kanmah nih kan tei tiah an ruah sual lai.

Ral tei awk ah Jehovah bawmhnak kanherh theng lo tiah an ruah sual lai. Cucaah Jehovah Pathian nih Gideon sih ahcun tihin a ti. ‘A ṭih mi vialte inn ah kir dih u tiah chim hna,’ tiah a ti. Cu bantuk in Gideon nih a tuah tik ah, ralkap 22,000 cu inn ah an kir. Cutik ahcun ralkap 135,000 doh awk ah ralkap 10,000 lawng an tang cang.

Sihmanhsehlaw, ngai hmanh uh! Jehovah Pathian nih: ‘ Mi tam tuk na ngei rih ko,’ a ti. Cucaah mi hna kha hi tiva ah hin ti dinter hna law ti din awk i ti he a hmai hmuahchih lak in a kun mi vialte cu inn ah kirter dih hna tiah Gideon cu a chimh.

Ti an din lio i khua a zohpah mi 300 he lawng teinak cu kan pek lai,’ tiah Jehovah nih bia a kam.Cubantuk in,Gideon nih cun a tuah i,ralkap 300,a ral a ttha mi he lawng,an ral ting 1 le thong sawmthum le thongnga.135,000,cu an doh hna i an tei hna caah ,Israel miphun cu,Midian hna kut chungin an chanhchuah hna.

Gideon a ralkap hna bantuk in a ral a chia mi ralkap thong sawmthum renglo kha inn ah kirter an si i,a ral a ttha mi ralkap 300 telawng kha Fideon nih an ral dihtu ah a hman hna i,ral cu an tei khawh.A tu kan ram chungah i kah dohnak a um cuahmah mi ah hin ralkap cu tampi kan ngei hna kha mu! kha lio ah khan kan thawngpaang cu a tur bakin a tur ko khah.

Asinain,a tu ahcun miphun a daw ko nain a ral a chia mi,bia si a phang mi tampi cu,kir uh ti haulo tein anmah tein an kir i,an zaam thluahmah cang,a tu a taang mi hi cu,Gideon ralkap minung 300 bantuk in a ral a ttha mi lawngte an si cang caah,kan ral cu kan tei hrimhrim ko lai ti hi lung in ruahloawk ttha lo khi a si.”Bawipa nih teinak he lam hruai ko hnaseh. Crd: Tinduh Thang