Arakan Army (AA) Dohnak Ah Kawl Ralkap An Sunghnak A Ruang

2019, Jan 4 ah AA nih Rakhine ram Police sakhan pawl an kah hna i, polic 13 leng an thah hna thok khan Suh Kyi nih kawl ralkap pawl cu “that dih hna uh” (Crush them) tiah nawl a pek hna. Kha ri thok khan kawl ralkap nih AA cu biatak thlak tein doh hram a rak thok hna i, a tu 2020, Feb thla hin cun nifatin ti awk in an i dohnak hi kumkhat lengkai a si cang. Sihmanhsehlaw, an i ruahning tluk in kawl ralkap nih an tuahhmuah kho hna lo, anmah kawl ralkap lei lehlamtu AA dohnak ah a thi mi hi ralkap 2,000 leng an phan (ralbawi tampi telh in). Phundang in kan chim ahcun, AA raldohnak ah kawl ralkap cu zohchia ngai in an sung ti khawh asi.

Kawl ralkap nih nifatin ti awk vanlawng, tilawng le ke ralkap in an kah ko hna nain ruah ningin hmul a ngei ngaingai lo, mi sawhsawh tu nih AA nak faak in an tuar. A ruang cu a tu tiangah AA nih control area pakhat hmanh an ngei rih lo, temporary i dornak men tete in buk an i sak i khuazakip ah an i thawn tawn. Kawl ralkap an cawlcangh deuhnak poh ah an kal i a thli tein an kah hna, an mission a dih in an zaam taak hna. Kawl ralkap nih va lehrulh ve nak ding caah an umnak an thei kho sat hna lo. An umnak a si rua ti an ruahnak, a hrawnghrang in an kah hna tikah anmah AA nak in mipi an hliammi hna an tam deuh hui.

Vanlawng in heh tiah an kah len hna nain AA an thih khawh tuk lonak a ruang cu, an nih cu tuhmawng chungah khua an sak tikah vanlawng zong nihcun ruahdamh in a kah hna i a vanchia taktak mi lawng a kheh hna i, tam deuh cu vawlei kua an khuahmi chungah hnangam tein an zaau i an i hniglh tiah mi pakhat nihcun a chim (a capo zong si kho men). Culengah, AA bawibik sang a simi Dr Ngo Twan Awng nih VK ah a postmi a hmanthlak pakhat ah Vanlawng kahnak pi aa bai lio an hmuh tikah a neih tuk in va kah ahcun Vanlawng kahnak hna ngei sual hna sehlaw, an kan kah thlak sual lai ti an phang hui i neih tukin an kaap ngam hui hna lo. Tuhmawng chung aumi chinchap, lamhlat pi i Vanlawng kah cu, AA caah zeihmanh tih a nung lo, vanlawng zawng nih a that kho hna ngaingai lo.

Cucaah, a tulio AA nih an hmanmi Tactic hi USA nih Vienam ral lio ah an rak tonmi bantuk a si i kawlram caah tih a nung tukmi a si. Ual lo ah kawl ralkap tam tuk te an sunghnak a si te lai. Fawi le bai ah AA ral hi doh le hrawh khawh phun an lai lo tiah International Observer cheukhat nih an chim. Kawl ralkap hlun U Myint Shwe nih AA cu hriamnam i kuatnak lam a ngeih lo caah can tlawmpal kan kah hna ahcun an zenkuan a dih lai i an i surrender te ko lai. An tai an i menhmi zenkuan dih phot seh tiah a rak chim bal. Asinain, kumkhat leng an i kap cang i an zenkuan a dih kho bal hlei lo. Lam khakhat in hriamnam an i kua chan kho tinak cu a fiang ko cang. Cuccah, AA doh hi kawl ralka nih a ngol awk a si, a dih zau kho dingmi raldohnak a si lo. By, Thaceu Lian