American New Jersey Ah Meithal I Kahnak A Chuak Minung Paruk An Thi

Vawlei cung ram ah ramrum bik le security a ttha cem tiah an tihmi American cu thinphan dai lo an si cang. A ruang cu, tu le tu in meithal i kahnak a chuak caan minung tampi nunnak a liam nak ram pakhat a si. American ram New Jersey state Jersey myo ah nazi caansau nawn meithal kahdohnak a chuak i palik bawi pakhat telh in minung paruk an thi tiah theih a si.

Mah thil cangmi cu December 10 nizan suimilam 12:30pm hrawng ah a cangmi a sii, Jerey myo Bay View an tihmi ah palik nih minung pahnih an zumh deuh lo hna caah check hlatnak cu palik pakhat nih tuah a vun hna ah bak ah khin meithal nih an rak thih i U-Haul company nih an sermi mawtaw cu a fir i a zam pi. Mah hnu ahcun minung pahnih an zumh lo hna cu Jersey myo Kosher super market chung ah an zam i an lut.

Mah minung pahnih nih cun meithal an rak i ken mi nih cun super market chung ummi mi pathum cu thillak in an kah hna. Mah hlan deuh i sungthoh an kah thihmi palik cu kum 39 mi a sii, a min ah cu Joseph Sill tiah an auhmi pa a si. Mah palik pa cu kum 13 chung palik ah rian a rak ttuan cangmi a si tiah theih a si. Super market chung cu SWAT an tihmi palik phu hna nih an luhhnawh hna kahnah fakpi a chuak i palik nih meithal a kengmi mi pahnih cu thi lak in an kah hna.

Mah thil cangmi cu mit i a hmutu hna nih an chim ning ah cun Kosher super market SWAT ralkap hna nih cun an kulh i kahdohnak fakpi a chuak tiah Daily Mail ah cun an langhter. Mah kahnak a chuakmi ruangah cun palik pahnih pin ah micheu khat hna cu fak ngai in hliam hma an pu tiah nawl ngeitu lei nih cun an chim. Mah kahnak chuakmi cu hlathlainak an vun tuah tik ah cun ralhrang hna si dawh an si lo tiah palik lei nih cun an chim.