A Mei ah si loin a Lu ah kan ser hna lai

Bawipa Bia ahcun hi ti hin a um: Deuteronomi 28:13 “Khuazing dang biak awkah orhlei ah siseh, kehlei ah siseh nihin ah kan pekmi hna nawlbia in nan pial lo ahcun, Bawipa nih nannih cu mei ah si loin, lu ah an ser hna lai; a zik ah nan um zungzal lai i a hram ah nan um bal lai lo.

Bawipa Bia ahcun a mah a biami, a nawlbia a zulmi miphun cu a mei ah si loin a lu ah kan ser hna lai, a tang ah si loin a cung ah kan chiah hna lai tiah a um. A sinain nihin Laimi nih Bawipa cu kan i țih sek len ve ko, kan ti khawh tawk in a bia cu kan ngaih len ve ko nain, a lu cu chim lo, a mei hmanh ah a mei par ah kan um, a cung cu chim lo a tang hmanh ah a tawphah ah kan um.

Pathian bia le Vel zei ah a rel lomi Miphun Kawl bantuk hmanh kan lu ah an cang, kan cung ah an cang, zei dah kan bau? Nan ruat cio maw? Mitthli le hnapduk he thla kan cam hi a tam cang ko. Nain zei tik hmanh ah Miphun luatnak le Lai miphun țhawnnak ah thla kan cam a um bal lo. Pu Hawi Tin ca zong ah thla nan cam lai lo ka hngalh ko.

Nain kei cu ka cam pin ah Global Rawn Chin Media bak in thlacam ding kan sawm hna i, a luat hrim lai ti zong kan chimh hna. Sinain a tu ahcun phikphahling bang credit cuh ah an phul. NLD țanhtu nih Cozah nih mizoram a fial ti deuh in an i la. Micheu nih tuluk an ti, micheu nih CNA le CHRO an ti. an mah AA zong nih mizoram ruangah ti zong an ti lo.

Tuluk ruangah ti zong an ti lo. A ho ruang ti zong an ti lo. Siang Bawi ruangah ti ding an si nain Sniper le mithla bantuk in hmuh khawh lo le holh in an chim khawh lomi thiamnak ka hman caah a si. Kei cu sniper ka si i, Rambo bantukin langsar ngai in mah hmaikaa ummi pi lawng kah ka duh lo. Zapi nih hmuh phak khawh lomi ral calpadar kaptu ka si.

Lih News nih an ruahdamhnak sawh in China e cu e an ti a si. Kawlca le mizo ca bantuk țialmi paoh hi Laimi nih cun a dik bik le official ah kan rel. Pu Hawi Tin ka chanhchuahmi hi kaa chir pah tawn. Laimi group pawl lak ah credit cuhnak ah an hman tikah. Laimi tam deuh kan thlacam cu Kan mah pumpak rumnak le luatnak, lu ah cang nak ca lawng ah kan cam peng.

Israel miphun he kan thlacam aa dang tuk. Israel pawl cu an mah pumpak caah thla an cam a um huaha lo. An ram ca, an miphun caah an cam a tam deuh. Rawl ul in le buri khuh in heh tiah mitthli le hnapduk he thla an cam caan a um nain an mah pumpak caah a si bal lo. An ram luatnak ca le an ral hna an tei khawhnak caah a si deuh. Hallelujah… Amen….

Laimi kan rawl ulh le kan thlacam a tam deuh cu kan mah power, thlarau țhawnnak, thluachuahnak kan ngah khawh nak ding deuh ah aa hngatmi a si. Cu pah cun thlarau caah tiah tlawmte kan hei kemh chih tawn. Mah hi ti ning cun hi hnu kum thong khat zong thlacam u sih law kan luat hlei lai lo. Union of Myanmar miphun vialte lak ah zahthlak le a meipar le a tawne peng kan si ko lai.

Union of Myanmar ah a lu bik kan sinak lai caah thla kan cam a herh cang. Kan thlacam kan thlen a herh cang. Biakinn ah cun zei tluk in ” aw a va nuam e Bawipa thanțhat cu” va ti hmanh sih law a leng ah Biaknak dang, Miphun dang, Kawl kut dang kan um chung poah cu nuamnak tling, daihnak tling kan hmu kho lai lo. Ruah len awk um ti lo, tuanbia nih tehte a pek cang mi a si.

Khrifa le Thlarau fa taktak a simi, Pathian mifa tak a si mi nih cun Isreal miphun bantukin Miphun dang uk cu kan i nautat awk a si. Kan doh awk a si. Cu cu kan rian ngan bik a si. Israel mi nih Pathian lung kan tlinh ti lo hi teh tiah an hngalh khawhnak langhnak pakhat cu Miphun dang kut tang ah an tlak kha a si.

Cu tikahcun Bawipa hmai an kawl țhan i Hriamnam he a uk tu hna mi phun kha an doh țhan hna i cu tik ahcun Bawipa nih teinak a pek than hna. Laimi cu Luatnak kan duh nain mah nih raldoh cu sual ah kan rel. America bantuk nih kawl ram hi kan tuk piak hna seh law luatnak kan pe hna seh law Bawipa a tha tiah aa lawm ding cu kan si țhiam.

Nain cubantuk cun a si lai lo. Kan mah ke tein kan dir tik le. Kan mah kut tein hriamnam kan tlaih tik lawng ah le dothlennak thi le thlan he, Israel miphun bantukin kan tuah tik lawng ah vawlei hmai ah limhang, daihnak, ruannak, mah te uknak cu kan ngeih te lai. By, Siang Bawi

Leave a Reply

Your email address will not be published.