Vawlei Ralpi. Vawlei cung ah ralpi voi 2 a tho cang. Tutan Russia le Ukraine kong ah ralpi 3nak a tho men lai tiah a tir ah ruahdamhnak a chuak nain a tho lai lo timi ruahnak nih a khuhchilh ṭhan in a lang. Ralpi thawhnak kong tiphun in umharphen rel awk ah a thluamthlam kan zoh tuah lai.
Ralpi voi 1nak kha 1914 ah a rak tho. Nain cuti ralpi thawhnak a hram a rak thlak hi cu 1870-71 hrawng khan a si diam cang ti a si. Ramnawrh (colony) pawl kar ah thazaang i zuamcawhnak a rak fak. Ticun ramnawrh pawl karlak ah i remlonak a um pah lengmang i 1914 ah kham awk ṭha loin vawlei ralpi 1nak a rak tho.
Vawlei ralpi 2nak zong 1939 ah a tho nain hram a rak thlaknak zoh tikah ralpi 1nak a dih khan a si diam cang. Hitler kha ralpi 1nak ah German ralkap a rak si ve. An ram Germany ral a sungh kha a lung a rak fak tuk. Tikah amah hrim kha aa zuam i German ah ram a khel.
1923 hrawng in a cawlcang i 1933 ah nawlngeitu ah aa chuah. Hitler a kai hnu ral a tho te lai timi an rak ruahdamh cang. 1939 ah German nih Poland an nam i ral a tho taktak. Ralpi kong zoh tikah kum saupi i tuaitam hnu ah a tho timi hmuh khawh a si.
China nih US van lonh a timh lengmang tikah US le democracy ram pawl zong an i biatak ve. 2050 hrawng a phak cun US nakin China hi chawlehnak ah a sang deuh te lai tiah 2000 hrawng khan rak chimphai a si i 2020 hnu cun China chawlehnak a ṭhan ning a rang kho tuk cang.
China nih vawleipi hi chawlehnak in khuhchilh a kan timh timi Africa ram tiang rian a va ṭuan khawhnak nih a fehter chin. US ah bank an pur pah. Hinih US ramkhel zei maw zat a hnursuan kho. Democrat pawl ca 2024 thimnak an sunghnak zong hmanh maw a phakpi, chim awk ṭha hlah.
Vawleipi nih dollar i tlaih cio a si tikah dollar boruak aa mah lo ahcun chawlehnak tampi a zorter tawn. India zong hi Soros phu nih hnahnawhnak pek dawh in an chimphai cang. Soros hi Open Society a dirh i ramkip ah an cawlcang.
Vawleipi khuate an timi hi khuate hmanh ah khuate hmete taktak ah aa chuah cang. Ram a hme tinak si loin IT chan nih a hmemi dirhmun ah a kan chiah tu a si deuh. Hitluk vawlei a ṭhangcho mi dirhmun ah Laimi bel kan lungput nih kan ram a hmetter chin lengmang. salai Thawngpi