Ramkip um Thau khuahlun mi hna nih MMK sing 1,300 renglo dih Thantlang peng Thau khuahlun ah pe 40 a sangmi vailamtung an phun.
Hi vailamtung hi Construction Engineer Dawt Ṭha Hlei Par nih ṭuanvo lak in an phun mi a si. November, 2022 in an thok i June 1, 2023 ah an lim.
Hi vailamtung cu Spain ram i vailamtung muisam lak in an tuahmi a si i aa dawh tuk hringhran. An dih hlan in Mizoram lei zong nih an rak zoh len cang tiah kan theih.
Hi vailamtung an phunmi kong he pehtlai in Global Thau Khuahlun Secretary Pi Rose Ngun Ṭha Chin (Denmark) nih a tanglei bantukin a chim.
“Atu i vailamtung kan phunnak tlang ah 1972 ah khan Mizoram in Missionary pakhat a ra i Bawipa nih hi tlangah lung va phun a ka ti a ti i lung pathum a rak phun.
Cu hnu cun thlacamnak tlangah hman a si. A hnuah Thau khuami Pu Za Al cu hi tlangah thla a cam i Pathian nih lung 12 a phunter ve. Cuticun hi tlang hi Thau khuami nih Pathian sinah rai kan thawinak le thluachuah kan halnak ah a cang.
Cucaah hi tlangah ahopaoh nih pehzulh in Pathian raithawi thlacamnak ah an hman i atulio i Thau khua ah aa dormi ralhrial tampi hna nih thazang laknak le lungdaihnak an hmuhnak hmun siseh ti kan duh caah tangka tampi dih in kan phunnak a si”. The Chin Post