Mi vialte kan Pa a simi JAHOVAH Pathian cu Jesuh Khrih thawngin thangthat si thluahmah ko seh.
Zeicatiah Amah sinah Jesuh Khrih min in Thiang Thlarau a halmi paohpaoh cu an i lawmhnak a tlin ve khawh nakhnga ding caah tiin cu Thiang Thlarau cu a pek zungzal tawn hna.
Jesuh Khrih zong nih, ”Nannih misual mi hmanh nih nan fale kha a thami thil pek awk nan hngalh hna ahcun van i nan Pa nih cun zeitluk in dah Thiang Thlarau a halmi cu a pek deuh hna lai?” tiah a ti hna. ( Luke 11 : 13 ).
Mi tampi nih cun Jesuh Khrih kan zumhnak ruangah hin Thiang Thlarau cu kan chungah a um zungzal cang tiah kan ti tawn.
Cucaah cun Thiang Thlarau hi Jesuh Khrih min in JAHOVAH Pathian kan Pa sinah kan hal tawn loh. Cucu a dik bakmi zong a si.
Cu lioah Jesuh Khrih nih, “Cu caan ahcun zeihmanh nan ka hal lai lo. Biatak kan chimh hna: Pa sinah nan halmi paoh cu ka min in an pek hna lai.
Atu tiang cu ka min in zeihmanh nan hal rih lo, hal u law cu nan hmuh hnga; cuticun nan i lawmhnak cu a tling lai,” tiah a rak kan tinak zong kha a si. ( Johan 16 : 23 – 24 ).
Khrih ah dawtmi u le nau hi vawlei Pathian pennak ah hin taksa in lawmhnak tlin na duh maw?
Kan duh a si ahcun Jesuh Khrih min in JAHOVAH Pathian kan Pa sinah Thiang Thlarau hal zungzal hna u sih. Zeicatiah cun a halmi paoh cu pek an si tiah Jesuh Khrih zong nih a kan ti. ( Mathai 7 : 8 ).
Pathian sin i thla kan cam tikah a pakhatnak bikah Thiang Thlarau hal zungzal hna u sih. Thiang Thlarau aa ngeihmi kan si ahcun theipar tha a tlai kho zungzalmi zong kha kan si fawn lai.
Cun kan i lawmhnak zong kha a tling fawn lai ee. Cucaah a pennak kha kawl hmasa u sihlaw thil dang vialte hna cu a kan pek thiamthiam ko lai ee. ( Luke 12 : 31 ).
A biathiang aa hrawm khomi zumtu nan dihlak sinah Fimchimtu Thiang Thlarau um zungzal ko seh. Thank You For All. Johnly Fambawl