Dawtnak in thawngttha ngaih kan sawm hna

Hi thawngttha nih na thinlung phurrit vialte cu an chawn dih ko lai tiah zumhnak ka ngei. A ngaitu nan zaapi te cung ah Pathian sunparnak lang ko seh.

Dawtnak in thawngttha ngaih kan sawm hna. Hi thawngttha nih na thinlung phurrit vialte cu an chawn dih ko lai tiah zumhnak ka ngei. A ngaitu nan zaapi te cung ah Pathian sunparnak lang ko seh. Amen!

Posted by Aung Myint Thang on Saturday, 1 August 2020

Relchap: BAIBAL HI A ZAAPI TEIN PATHIAN BIA ASI NA TI VE SUAL MAW?

Kan Laimi; abikin living churches pawl le evangelist pawl nih hin kan Baibal hi a zaapi tein Pathian bia; Genesis in Biathlam tiang hi Pathian bia asi tiah a au mi an tam ngai. An theihnak le an ruahnak a tlawm bia asi. Ttha te in atanglei ka ttial mi hi van zoh law van ruat ve hmanh.

1. Isaiah 14: 13 ah “Vancung ah ka kai lai i; Pathian arfi hna cung ah ka bawi tthutdan ka chiah lai” tiah vanmi sual; Lucifer nih ati. Mah hihi Lucifer bia bak asi le Pathian bia asi na ti kho maw?

2. Gen. 3: 4-5 ah “Nan thi lai lo; zeicatiah thei nan ei bakin nan mit ai au lai i pathian hna bantuk nan si lai attha le achia kha nan hngalh lai ti kha Pathian nih a theih” tiah Sehtan nih rul hmang in a chim mi bia hi zeitindah Pathian bia asi nan ti khawh?

3. Mat. 4: 3 ah “Pathian Fapa na si ahcun lung hi changreu ah can ter ko” tiah Sehtan nih a chim mi bia hi Pathian bia asi na ti kho maw? Sehtan bia hna Pathian bia asiko na ti ahcun na caah ttih a nung ngai.

4. Mat. 8: 29 “Pathian Fapa zeidah na ka duhnak a um? A can a tlin hlan ah kan nih dan tat awk ah na ra maw?” tiah khawchia nih Zisuh sinah an chim mi bia hi zeitindah Pathian bia na ti khawh? Khawchia bia le Pathian bia na cawh sual ahcun na caah ttih a nung tuk.

5. Baibal hmun dang zong ah tampi char ding an um len. Cucaah Baibal cu Pathian bia he; vanmi bia he; minung bia he; saram bia he; khawchia bia he Sehtan bia he ai cawh dih mi asi caah; “Genesis in Biathlam tiang Pathian bia lawngte asi” ti mi cawnpiaknak hi cu ruahnak tlawm bia le theihnak derthawm deuh bia asi ko.

6. Kan Baibal cauk hi a min ah “Holy Bible” ti asi. “The Word of God” ti asi bal lo. Zeicadah the word of God (Pathian Bia) tiah an auh lo ti ahcun Pathian bia asi dih lo ti kha an hngalh. Holy Bible ti cu “Cauk Thiang” or “Athiang mi Cauk” tinak asi ko. Zeicadah Cauk Thiang an ti tiahcun Pathian nih a thaw a chuah hnawh caah asi.

7. Cucaah hihi va philh hlah Pathian bia; minung bia; vanmi bia; saram bia; khawchia bia le Sehtan bia ai ttial mi kan Baibal ca hi Genesis in Biathlam tiang a zaapi tein Pathian bia cu ansi dih lo nain Pathian nih a thaw a chuah hnawh mi ( inspired words of God) bak asi. Cauk dang sawhsawh bantuk asilo.

Aung Myint Thang

Online Evangelist

Lungler