Covid-19 In A Zaw Mi Pa Ihkhun In A Tla I Oxygen A Piak Caah A Nunnak A Liam

July 31, 2020; Telangana, Karimnagar Government Hospital ah Covid-19 in azaw mi pakhat cu ihkhun cung in a tla sual i Oxygen an pek mi ai rawk caah a nunaka liam tiah theih asi. Mah thil cangmi cu pawngkam um mi hna nih an hmuh ko nain zawtnak kai sual an ttih caah an chanh ngam lo.

Ihkhun cung in a tla mi pa hi Gangadhara Mandal, Venkataiahpalli lei mi a si tiah theih a si. Van chiat ah ihkhun chung oxygen an pek cuahmah lio ah khin a tla sual i anunnak a liam hi a si. Hi bantuk vanchiatnak a tawn lio caan ah hin a pawngkam ah mi cu an um ko nain an chanh duh lo caah a nunnak a liam hi a si.

Pawngkam ummi hna nih ihkhun cung i a tlak le cangka sibawi te sin zawng ah an chim duh lo ruang ah an nunnak tiang a liam hi a si. Hi mizaw pa cu a thaw chuah a har tuk ruang ah oxygen an pek pengmi a si i, ihkhun cung i a vung tlak ah khin oxygen an pekmi ai rawk tiah theih a si.

Pawngkam um mi mipakhat nihcun hi bantuk thil cangmi cu hmanthlak a rak lak hnu ah social media ah a thanh cawlh i, nawl ngeitu hna nih sizung ummi hna cung ah dawtnak an ngeihnak lo tiang in a langhter chih.

Telangana cozah sizung ah hin Covid-19 in a zaw mi 1539 an um tiah theih a si. Covid-19 zawtnak a chuah hnu in pakhat le pakhat kar ah dawtnak a zor tluahmah mi vun ruah ahcun ngaihchia taktak khi kan si.