Myanmar Ram Pumpi Thimnak Election Suday Ah Tuah An Timh Ruang Ah Kan Zai Len Awk A Si Hme Maw?

November 8 (Zarhpini) ah Myanmar ram pumpi thimnak election kan tuah lai tiah election commission nih thawng an thanh. Zarhpini an thim ruang ah ‘Khrihfa zeirel lo a si’ tiin NLD dohtu phu an zai colh. An mawh lo ti ko u sih.

An zainak tam nawn ka hmuh caah ramdang election an tuah ni ka zoh, ram tam deuh nih Sunday an i thim ve kha fiang tein ka hmuh.

Khrihfa ram a simi Brazil, Argentina, France, Germany, Russia etc. zong nih election caah Sunday thengte an thim, mah hi Khrihfa zei an rel lo a si bak lai lo, i din ni a si caah mipi tam deuh nih vote thla kho hna seh ti an duh caah a si ko.

Kan ram cozah zong nih 2010, 2015 le 2020 election ni caah Sunday thengte an thim khi Khrihfa zei an rel lo caah a si hrim lai lo, Khrihfa nih cun ni dang si kho seh ti cu kan duh cio ko lai nain. Credit: Salai Lungthli Rum

Note: Lai mi khrihfabu tampi cu hruaitu kan i thim tik ah minung kan tling cem lai tiah Sunday niah thimnak a tuahmi an tampi ve. Cun mi tampi cu sunday niah khualtlawng hmangmi zawng kan tampi fawn. Mah he khin Myanmar rampi nih thimnak (election) sunday ah tuah an timh mi kawng ah kan buai len awk a si hme maw ti khi ruak awk ngai kan si.