Khuaruah Har News

Khuahruah har thawngpang relnak!

Wuhan Virus ruangah Singapore ram ah khuaruahhar tukmi thil a tlung

Singapore ram ah tulio vawleipi a lauter dihtu Wuhan virus zawtnak ttihnung nih an ram aphak thluakmah caah cozah lei nawl ngeitu hna lungrethei taktak an um cang. Nizan fabuary 7 ah khan Singapore ram ah cun Wuhan virus cu ttihung taktak mi dirhmun tiang aphan cang tiah cozah lei nih thawngthanhnak an tuah.

Corona virus zawtnak ruangah Singapore ram chung siangin ummi vialte hna cu lentecelhnak, nuamhnak tuahding in khualeng ahchuah ti bantuk vialte cu an khap dih hna. Mipi caah ralrin peknak an chim tthan rihmi cu, zawtnak a ngei mi nihcun inn ah um ding in le sizung ah an kal tik zawng ah mask vuahlo bu hrimhrim in inn ah ttin bak lo tiah thawngthanhnak an tuah hna.

Mah lawng hmanh silo in zunglei i cozah rianttuan paoh paoh cu nikhat ah vawikhat zawtnak ankai maw lai lo tihmi check-up nak tuah ding in an ti hna. Cun chumpi, hnap tling achuak peng a si caah aran nak in sizung ah kal cawlh ding in ralrin peknak bia an chim. Rianttuan tik zawng ah aphuphu in ttuan ah a ttha tiah an chim fawn.

Singapore cozah nih corona virus zawtnak cu orange color sinh tiang aphan cang tiah an thanh dih hnu tlawmpal ah khin Singapore ram minung vialte nih ah lengchuak hau bak lo ding in an herhmi eidin ding vialte cu heh tiah an ni cawk caah Singapore ram chung dawr ummi vialte cu an lawng dih tiah theih a si.

Tu dirhmun ahcun Singapore ram chung ah chungkhar nih ni chiarte an herh mi eidin cawk hmanh a um kho tilo tiah theih a si. Aruang cu corona virus ttih anunh chin lengmang ruangah lengchuak bak lo in inn chung ah i erhkhum dih an ni timh ruangah caan saupi tiang nguh ding in an cawk hna ruang ah a si.

Wuhan virus hi mifim thiam sang hna nih hlathlai an tuahning zoh tik ah kum 100 atlin caan paoh vawleicung ah zawtnak ttihnung atlung tawn tiah an chimmi cu hman dawh ngai a si. Kum 100 a vun tlin caan paoh ah kan vawleicung ah zawtnak ttihnung a chuak i, mah nih cun minung ting tampi nunnak alak tawn.

Leave a Reply

Your email address will not be published. Required fields are marked *