Coronavirus dohnak ding hrangah dollar 100 million tiang pekchanh nak atuah tu Bill Gate

Tuluk ram cu coronavirus nih a hninh in a hninh dih cang. Tuluk ramchungah coronavirus ruangah a thimi zat cu tuzing tiang thanhnak antuah mi ah khan cun 565 tiang an phan cang. Mah zawtnak a ngeitu mizaw hna zong nikhat hnu nikhat an karh chin lengmang tikah tuah cun mizaw 28275 tiang an sicang tiah Tuluk ram ngandamnak lei nawlngeitu hna nihcun an thanh.

Vawleicung ram 28 tiangah coronavirus arak karh cang tikah le mizaw hna nikhat hnu nikhat an karh chin lengmang lioah hin mah zawtnak in a dam mi hna zong 1200 tiang an sive cang. Tuluk ram nihcun mah coronavirus dohnak rian an tuan nak ah nawl an sermi buartu poh cu fak tak in dantat an silai tiah an thanh.

Tu bantuk in zawtnak nih mitampi nunnak alak peng rih ko lioah hin vawleicung billioare mirum pakhat asimi Bill Gate nihcun mah zawtnak dohnak ding hrangah dollar 100 million pekchanh nak atuah lai tiah February 5 lioah khan Bill Gate Foundation nihcun arak thanh.

Coronavirus ruangah Tuluk ram chungah minung an thih chap thluahmah lioah hin America ram chung zongah mah zawtnak ngeitu mizaw 12 tiang an sicang tiah theih asi. Mah dollar 100 million cu zawtnak hrik angei maw ngeilo timi cheknak, thopbul nak, zawtnak hrik ichonh kho ding dirhmun asimi hna ven nak hrangah then an silai tiah an chim.

Cun dollar 20 million cu ramchung cozah le WHO hna sinah pekchanh asilai timi zong chim asi. Tuluk ram nihcun zawtnak rak chuahnak hmun Wuhan khuapi le apawngkam khua hna cu zawtnak hrik hrampi tiah phih kharnak arak tuah ruangah minung 50 million hna cu khar chih an si tiah theih asi.

Mah hmun hman hrawngcu tu kum hra chung hrawng ah Tuluk nih thil serchuah nak hmun ah arak hman i chawleh thalnak hmunpi pakhat arak si. Wunkyo khuapi chungum hna cu in khat ah minung pakhat lawng nih an herhmi thil caw dingin ni hnih ah voikhat chuah khawh nak nawl an pek hna i tlanglawng dinh nak hmun hmanh 46 tiang khar asi tiah nawlngeitu hna nih an chim.