Iran Ralbawi General Qassim Soleimani Ruakvui Timhni Ah Minung 50 Renglo An Thih Ruangah Aruak An Vui Kho Lo

Islamic Revolutionary Guard Corps ah major general Qassim Soleimani le Irag ralkap hruaitu pakhat Abu Mahdi al-Muhandis hna cu America nih vanlawng hmangin akahnak hna ruangah an rak thi. General Qassim Soleimani ruak cu nizan January 7, kum 2020 ah khan achuahkehnak khua Kaman timi ah aruakvui an timh i mah lio ah mipi an tam tuk caah an tlu sual i minung 50 renglo an thi.

Iran le US karlak buainak ruangah achuak kho dingmi buainak kong cu vawileipi nih hna tunh in arak ngaih cuahmah lio pi ah an ralkap bawi Qassim Soleimani ruakvui timh ni ah miung tamtuk an nunnak aliam tihmi thawngpang cu BBC nih cun an chim. Major general Soeimani athih hleihlei ah mah bantuk i ruakvui niah minung tamtuk an vun thih tthanmi ruangah Iran cu dai tein um khawh dawh a si ti lo.

Trump nawlpek nakin atha tukmi drone hna hmangin January 3 lio ah khan an rak kahnak ah arak thi mi a si. Mah thahnak ah an rak hmanmi hriamnam cu bomb pakhat asive nain apuak lomi bomb asi. A puakmi nih athah nakin mah bomb chungin achuakmi nam bantukin aharmi hna nihcun akhen bakin an thi kho colh tawn. Mah a hartukmi thir hna nihcun kut le ke vialte atan khawh dih ti zong theih asi.

America nih angeihmi hriamnam hna lakah hin Hellfire Missile cu an rinhcanhmi pakhat asi. tutan an hman mi bomb cu R9X Hellfire Missile tiah an kawhmi asi tiah The Wall Street journal nihcun arak langhter. Mah bantuk nam achuahtertu bomb cu Pentacon le CIA nih voikhat veve an rak hman balcang. Mah bomb cu mipi hna tampi an thihlo nak dingah an sermi bomb thar asi.

Mah missile parzum taktak mi cu puak lo i an tinhmi lei panh in akal thluahmah hnuah an itinhmi aphanh hlante ah a parzum i cun a hartukmi nam paruk arak chuah hnuah ralhna cu an sam hna ti asi. Mah missile cu vancung in rak kahchuahmi hriamnam phunkhat asi tiah mah journal nihcun arak langhter.

American ralkap hna nih drone hmangin kahnak antuah tikah an itinhmi hmun hrawng hrangah rawhralnak arak chuak tawnmi kha tu an hmanmi missile an rak hman ruangah asi lai titu zong an rak um ve. Alqaeda hruaitu pakhat Abu Kharam motor kah arak silio ah nehnang tepawl zohtikah bomb puah ruangi rawkmi nakin nam ahartukmi hmangin tukmi deuh khi alo tiah Journalist pakhat nih cun achim.