2008 phunghrampi remh khawh hlan chung Chin Ram caahhin Chin State NLD hi biapi bik an si: Zasang Cinzah

2008 phunghrampi remh khawh hlan chung, Peace Process karlak period chung ahcun, Chin Ram caahhin Chin State NLD hi biapi bik an si tiah ka ruah zungzal. Zeicatiah, Ramsersiam kho ding dirhmun ah dirhmun thabik Party an si. 2015 lio zong ah Mipi nih an zumh ve hna i, majority in teinak an rak pek hna.

 

 

Asinain, 2015-2020 karlak an cawlcangh ning le Chin State NLD Committee an ihruai ning zoh tikah thetse/sand cungah innsak ko an lo. A fawinak in chim ahcun term khat lawng a nguhmi committe ko khi ka lawhter hna. 2020 election an von phan i anmah le anmah karlak ah an buaining nih an dirhmun a feh lo ning fiang tuk in a langhter.

Cucaah, 2020 election dih ahcun, an Party hi kum saupi a hmun dingmi committee in Reform an tuah a herh in ka hmuh. Abik in Mino aa fitmi tampi recruit an tuah hrimhrim hna a herh hnga. CNLD hi Chin Ram bunh Party an si i, MIPHUN Party tiah claim an ituah tikah Chin miphun thinlung ah tampi hmunhma an la.

Asinain, an ihruai ning system, an committee zoh ve tikah, chikhat idornak ca men ah riahbuk sakmi an lo ve. Election an luh hlan hrim in isiknak nih a tuam colh ve hna. Zeicatiah, a fekmi inn thate in an isak cia lo caah a si. Election hlan Kum hnih, 2018 lio ah Party 3 an rak ifawnh i hruaitu ithim dingin caan tampi an ngei ko.

Asinain Election dih ah convention kan tuah te lai i, cu tikah official in chairman ithimnak zong kan tuah te lai an rak ti. Atu official in ithimmi chairman an ngei rih lo. Party hlun ah chairman pawl kha, an dihlak in an ttuan i, thutnak kha a chang in an ichang. Zeiruang ahdah a si hnga kan rak ti cio.

Asinain, naite ah biafiang a von chuakmi cu CEC chairman cu Automatic in a duhnak hmun paoh ah candidate pek dingin phung an ser caah, an 3 ning in an duhnak hmun paoh ah candidate an hmuh khawhnak hnga, lam an rak isial cia kha a si. Amak ka ti. Cucu, Local EC chairman nih aa copy ve i, Thantlang ah khuaci an mui.

Biafunnak: Chin Ram hruai ningin Political Party a dirhmi paoh nih nan dirhmi Party kha riahbuk sak men in sak ding a si lo. A fekmi, caan saupi tiang a nguhmi, concrete building sak in nan sak cio awk a si tiah ka ruah. Cu tikah, Mipi zong nih an sakmi inn ah raltha tein kan idor ngam hnga.