𝐅𝐚𝐥𝐞 𝐍𝐢𝐡 𝐓𝐡𝐢𝐧𝐥𝐮𝐧𝐠 𝐓𝐡𝐚𝐰𝐧𝐧𝐚𝐤 𝐀𝐧 𝐍𝐠𝐞𝐢𝐡 𝐃𝐢𝐧𝐠𝐚𝐡 ” Nule Pa Nih Kan Tuah A Herh Mi Pahnih

” 𝐅𝐚𝐥𝐞 𝐍𝐢𝐡 𝐓𝐡𝐢𝐧𝐥𝐮𝐧𝐠 𝐓𝐡𝐚𝐰𝐧𝐧𝐚𝐤 𝐀𝐧 𝐍𝐠𝐞𝐢𝐡 𝐃𝐢𝐧𝐠𝐚𝐡 ” Nule Pa Nih Kan Tuah A Herh Mi Pahnih.

Fale nih thinlung thawnnak (resilience) an ngeih khawh nakhnga nulepa nih tuahpi ding thil phun khat hrawmh kan duh hna.

Chungkhar ah fale zohkhenh tikah an thinlung a thawn nakhnga a thami zia tete serpiak a herh ngai. Aruang cu, kan theih lo karlak ah thinlung hma fak tukin an rak ngei kho. Kan theih tikah cun zei maw zat luan cang khawh a si. High and Low Habit hi a thami tuahkel zia pakhat a si. Zei tin kan tuah lai ti ah cun,

1. Nikhat voikhat zan ih lai chungkhar i ton caan ah fale kha nihin na tonmi chungin an nuamh termi, teinak na hmuhmi, asilole thil tha pakhat khat paoh chim cio uh tiah biahalnak ngeih ding a si.

Cu tikah fale nih an tonmi chungah a thami, grade tam an hmuhmi, midang an bawmh khawhmi, an saya/sayama nih an lawmhmi kong ti bantuk kha chimnak an ngei cio lai. Nulepa zong nih an tonmi chungin thil tha tete kha an hrawmh ve hna lai.

Tahchunhnak ah, nihin cu ka boss nih na thil tuahmi a tha tuk tiah a ka thangthat, ka riantuan hawi zei tin dah ka bawmh khawh i aa lawm tuk, ka lahkhah a kai ti bantuk kha chim ve ding a si.

2. Nihin na tonmi chungin na ngaih an chiat termi thil pakhat khat kong, na sunghmi thil pakhat khat kong, na thin an hun termi thil pakhat khat kong, na lungre an theihtermi thil pakhat khat kong ti bantuk kha hal i chim cio caan pek hna ding a si.

Fale nih nihin sianginn ah aho nih a ka nek (bully), zei subject kha ka thiam lo tuk i ka lungre a thei, zei subject ah ka mark a tla tuk ti bantuk an tonmi kha chimnak caan pek hna ding a si.

Nulepa zong nih an rian lei an tonmi lungnuamh lonak thil pawl kha an chim ve lai. Tahchunhnak ah, ka rian ah aho nih a ka ngiar lengmang, ka boss pa nih ka chimmi a theithiam lo ti bantuk kha chim ve ding a si.

Cu tikah, fale nih an tonmi thil tha kha thangthat i, thil tha lo an tonmi cungah khan sik loin, thazaang tu pek a si lai. A herh ahcun, na kuh lai i thazaang na pek lai.

A donghnak ah kan tonmi thil paoh kha Pathian sinah ap buin le lunglawmhnak bia chim cio buin kan donghter lai.

Hi bantuk in tuah tikah a chuahtermi cu a tanglei hi an si. Fale nih an tonmi paoh kha anmah lawng nih tuar loin chungkhar ah phuannak caan an ngeih tikah an lungthin hma a damter lai. An lungretheihnak in thaw chuah caan an ngei lai.

An tonmi thil kha nulepa nih theihpiak a si tikah, thil tha lomi a si ahcun kilvennak tuah khawh colh a si lai.Chungkhar ah pakhat le pakhat i dawtnak a lumsa lai.

Fale nih an tonmi chungin hmailei caah an cawn ding le an theih ding thil pawl an cawn lai. Anmah le anmah i zohthannak caan (self reflection) an ngei lai.

Theihternak: Rosanna Lin,  Expert in Marriage, Family and Education nih chimmi chungin cherhchan in ka tialmi a si.Crd : Dr. Fom Men ( Amos Nu ) FB